中環出更：陸恭蕙教上癮 做UCLA客座教授
環境局前副局長陸恭蕙離開熱廚房之後，似乎萌生咗「教書癮」，繼早前喺香港科技大學兼任教授同擔任新書作者後，佢最近更衝出香港，為美國加州大學洛杉磯分校（UCLA）擔任客座教授，同啲學生討論國際層面嘅經驗喎。
將邀港商做訪問 分享經驗
政府尋日公布陸恭蕙下年二月將會出任UCLA客座教授，為期五個禮拜，屆時佢會邀請一啲本港商界人士喺網上做訪問，同當地學生討論香港商界喺國際層面嘅經驗。
前任行政長官及政治委任官員離職後工作諮詢委員會認為，陸恭蕙份新工唔會構成任何潛在利益衝突，亦唔預期會引起負面公眾反應或公眾觀感。
其實陸恭蕙卸下官職之後動作多多，尤其鍾意從事同「書」有關嘅工作，佢先係去科大做兼任教授，再為一個私人慈善基金會嘅獎項做顧問，其後又擔任香港大學出版社嘅作者，更新佢一本有關中共嘅著作同預備新書嘅稿件。
卓妮