政情：建制罕撐朱凱廸 劉怡翔頭痕
非建制派立法會議員朱凱廸多次喺立法會出「怪招」拉布，包括就政府法案提出不中止待續議案，又引用立法會《議事規則》動議要求立法會開會時傳媒離場，真係拉布拉到建制派都嬲嬲。立法會財務委員會尋日開會，討論朱凱廸提出嘅檢討基本工程儲備基金整體撥款機制嘅要求。財經事務及庫務局局長劉怡翔同工程界議員盧偉國（WK）都反對改動現行機制，擺明係擔心會被非建制派濫用，成為拉布工具，但多名建制派議員竟然掉轉槍頭撐朱凱廸，朱凱廸呢鋪會唔會受寵若驚呢？
財委會尋日召開特別會議，討論朱凱廸有關檢討基本工程儲備基金整體撥款機制嘅要求 。根據現行做法，項目預算唔超過三千萬元嘅工程項目可納入基本工程儲備基金整體撥款，一旦納入整體撥款，議員只可以選擇全數通過或全數反對。
促檢討基本工程撥款機制
立法會上一個年度，財委會就審議一筆為數一百二十四億元嘅整體撥款，但政府就將橫洲發展計劃前期工程撥款等二十多項具有爭議嘅項目納入整體撥款，引起朱凱廸等民主派不滿，要求抽起有關項目，最後民主派更就整體撥款喺財委會轄下嘅工務小組同財委會大舉拉布。所以劉怡翔尋日喺會上都話擔心改動現有機制會牽一髮動全身，令審議程序膨脹。
仲以為建制派因拉布拉到怕怕，會齊心協力反對朱凱廸嘅建議。點知除咗WK批評民主派對整體撥款安排嘅質疑係基於不信任，係不必要，同埋無視客觀情況之外，幾位民建聯（民記）議員竟然掉轉槍頭，話整體撥款安排一九八二年至今行咗咁多年，都係冇檢討，認為政府都有需要自己檢討吓咁話。
建制突將矛頭指向陳健波
其中梁志祥更直指按依家機制，議員如有不滿係可以表達，但要推翻就好難，仲突然將矛頭指向財委會主席陳健波，話主席有責任制訂機制，令到政府工程喺大多數議員唔同意嘅情況下，議員可以表達意見兼令政府作出改變。而同屬民記嘅蔣麗芸亦都話政府可以檢討有關安排，仲話如議員對項目有意見，應容許議員聯署提出抽出議程。
正如朱凱廸所言，舊年整體撥款中九千多個項目就因其中一兩個有爭議，而令整個整體撥款被拖垮。所謂一粒老鼠屎可以整臭一煲粥，與其因為一兩項具爭議撥款，令到成個整體撥款被拉布，劉怡翔真係不妨諗諗計，睇吓點樣可以兩全其美喇！