中環出更：流動支付登港 名人獻計推回贈
港鐵下個月試行微信購票計劃，意味內地引以為傲嘅流動支付模式正式登陸香港。至於香港係咪可以好似內地咁，人人都用手機來應付日常消費交易，城中名人嘅睇法都好唔同。
卓妮日前喺馬場遇到博愛醫院當年顧問譚健業（Patrick），佢認為香港嘅電子支付系統不但相當成熟，普及性高且選擇亦多，例如八達通同信用卡等，除非內地流動支付平台能夠提出誘因，倣效信用卡消費之後有回贈優惠之類，否則要港人改變習慣，轉用內地嘅手機支付系統係有一定難度。佢又話無論流動支付系統如何先進，都無法完全取代現金嘅功能。例如賣旗籌款，現金對於慈善機構而言，處理上都較流動支付來得方便同直接。
香港青年聯會常務會董王槐裕近日下載咗流動支付應用程式，仲畀佢發現喺便利店購物用手機支付會有消費回贈添！不時去內地公幹嘅佢話內地曾有流動支付平台為咗爭奪市場，不惜向的士乘客同司機提供回贈優惠，依家內地流動支付平台有意喺香港市場立足，亦可以憑其雄厚財力故技重施，畢竟消費者嘅選擇，主要係視乎邊個支付平台有「着數」。
馬天聰冀盡快普及
咁做老闆嘅又點睇呢？經營飲食集團嘅總裁協會副理事長馬天聰就話，明白港人欠缺使用內地流動支付平台嘅意欲，但喺營商者嘅角度，做生意除咗港人顧客，內地人嘅消費習慣亦都不可忽視，加上用手機消費同網購有相似之處，屏幕上嘅價目喺消費者眼中只係一堆數字，付款會特別豪爽；但若換成花花綠綠嘅現金，消費者付款前就會思前想後，所以佢期望內地嘅流動支付能夠喺香港市面盡快普及。
卓妮