政情:橫洲風波燒到鄉議局 劉業強考牌戰拆彈

橫洲發展項目提出四年,立法會終於喺今年初通過撥款,繼摸底風波後,議題曾經沉寂一時,但其實暗湧一浪接一浪,尋日更加燒到新界鄉議局,睇怕呢個將會係子承父業執掌鄉議局兼新任行政會議成員劉業強嘅首個考牌戰,究竟點樣拆彈,就要睇佢有乜板斧嘞!

一直有傳鄉事同政府就賠償金額「傾唔掂數」,更傳有原居民獅子開大口嗌高五倍賠償價,最後搞到依家橫洲發展範圍比原定計劃細。受到發展計劃收地影響嘅三條村,包括永寧村、鳳池村同楊屋新村等三十幾名村民尋日踩上鄉議局抗議,不滿政府就橫洲發展工程,要求一百多戶未獲安置嘅村民喺明年元旦前遷走,但當中只得七戶安排到上公屋,其他人就冇份,形容依家係滅村,叫班鄉頭幫拖,唔係就預言「明日他村也相同」,睇嚟就想攬炒逼劉業強同政府拆掂佢。

稱遷離期或可延至新春後

劉業強開完鄉議局會議後都急急腳同班村民會面,話早前已同村民見面,了解訴求,而佢亦已經同運輸及房屋局商量,又引述局方指公屋嘅入息審查是固有制度,但延遲居民遷離期限至農曆新年後嘅機會較大,指發展工程影響四百多名居民,政府會恩恤。但班村民就明刀明槍要求免審查上公屋,劉業強就話政府有政策,「呢個結係未解得到嘅」。咁講法,都係傾唔埋欄喎,點解決?

菜園村收地 政府賠20億

老實講,鄉議局以前都同政府拗過數,令政府天價賠償唔係未試過,好似菜園村咁,村民對收地就耍手擰頭,又喊晒口,但班地主就舉腳贊成,皆因政府肯提供廿億元嘅賠償。今次橫洲賠到幾多?村民滿唔滿意?就要睇劉業強有冇牙力嘞,傾得掂條數就係功績,傾唔掂就可能增加離心力。呢次考牌過唔過到關?真係要拭目以待。

第一手消息請下載on.cc東網iPhone/iPad/Android/Windows Phone Apps