中環出更：陳健波爆料 拉布累張華峰錯失升市
話說尋日喺立法會繼續審議由政府所提出嘅高鐵一地兩檢無法律約束力議案期間，有反對派批評部分功能界別係「零票」議員，欠缺民意支持，自動當選嘅保險界陳健波（波哥）之後喺會上反擊，指會議冇流會，全因功能界別謹守崗位，仲大爆金融界嘅張華峰（肥老闆）錯失股市升浪。咦！咁肥老闆咪好大損失囉？
擔心客人「賺少咗」
波哥話肥老闆嘅個人業務「每日億億聲上落」，但佢仍堅持留喺議會，避免流會，又話肥老闆偶爾投訴「今日因為留低，又錯過咗個（升）浪」，但佢指對方係笑住咁話，證明功能界別議員視議會比金錢更重要。
事後問番肥老闆係咪蝕咗好多？佢就解釋，自己依家只係揸住388（港交所），而賺少咗嘅意思係少咗幫啲客，因為股市必須即時（目及）住，但係佢依家成日都要留喺立法會，所以唔敢畀意見啲客咯！
卓妮