中環出更：講究生活品味 蕭郭湘圓重修養
除咗講盈利，成功嘅企業都有佢嘅使命。一年一度嘅金紫荊女企業家獎尋日公布得獎名單，五位傑出女企業家獲得表揚。得到金紫荊女企業家榮譽大獎嘅係經營高檔家居用品嘅蕭郭湘圓（Wendy）。其實Wendy喺十二年前就得到法國政府頒授國家騎士勳章嘅終身榮譽，其後又獲頒國家榮譽官員勳章，以表彰佢喺香港推動法國文化嘅功勞。講究生活品味嘅佢，使命就係想將法式生活藝術同中國文化融合，改善個人修養。
Wendy強調奢華唔代表有品味，反而係要具有一定嘅修養，先懂得欣賞事物，從而提升文化深度，而呢方面西方人無疑係較進步，但好可惜近年來港人嘅生活藝術或文化修養都處於停滯狀態，同昔日相比港人嘅眼界似乎係狹窄咗。不過佢話若果能夠以謙卑態度來檢討自己嘅不足，就會有改進嘅餘地。
徐詠琳推廣飛鏢運動普及化
至於獲得金紫荊女企業家非凡大獎嘅徐詠琳，佢嘅使命係想將飛鏢運動普及化，最終能夠進身為奧運項目，佢話起初推廣飛鏢之時，好多朋友向佢潑冷水，話飛鏢唔能夠離開酒精，但佢始終深信飛鏢運動不但可以老幼咸宜，就連香港嘅飛標手亦有闖出國際嘅一日。同樣係非凡大獎得獎人嘅私人教育機構創辦人梁賀琪，身為補習天后嘅佢話自己經常向學生「認錯」，因為佢要同學生解釋，學英文若果怕出錯而唔講嘅話，咁就一定唔會錯但亦唔使旨意有進步，相反從錯誤中學習，至會有更深刻嘅領悟。
另一位非凡大獎得獎人係從事金融業嘅楊玳詩，身兼證券商協會嘅佢話要為業界爭取權益之餘，又成立證券商協會基金，以援助社會上嘅基層人士。佢話金融業除咗賺錢，致力回饋社會都係佢嘅一個使命。
卓妮