中環出更：點人數狂響鐘聲 梁美芬話有幻聽
民主派近日接連使出「怪招」阻撓立法會辯論一地兩檢動議，期間又不斷響鐘要求點算法定人數燒時間，甚至引發流會。建制派立法會議員梁美芬尋日接受電台訪問時，就大呻連串鐘聲令人出現幻聽，批評民主派拉布浪費議會時間。
斥無助監察政府
民主派會議召集人莫乃光（Charles）就話，唔應該將拉布睇成浪費時間，反斥建制派趁六名民主派被取消議員資格後，利用人數優勢試圖修改《議事規則》，表面上係防止拉布，實際上係削弱立法會監察政府嘅能力喎。梁美芬反駁，以往建制派與泛民可以合作監察政府，依家後者就只懂拉布同點人數，講埋啲離題同無聊嘅嘢，無助監察政府。
身兼行政會議成員嘅建制派議員張國鈞就話，政府已就一地兩檢安排開誠布公，包括主動提出動議畀立法會辯論，強調「三步走」方案有迫切性，質疑政府要做幾多嘢，民主派先至會滿意。Charles最後承認，無論民主派點拖，一地兩檢動議都好大機會喺嚟緊呢個禮拜通過。搞咁多最後都通過，唔係浪費時間又係咩呢？
卓妮