政情：今日你上鏡：錢大康蝦碌 咪牌反轉再反轉

浸會大學校長錢大康身兼計算機科學系講座教授，佢對於科技就好叻嘞，但係佢尋日出席一個創科活動時，就有蝦碌嘢發生喺佢身上喎。話說佢係其中一個環節嘅主持，當佢攞起個咪介紹嘉賓時，個咪牌就掉轉咗，在場有人提醒佢後，佢調番正面一陣，但係好快又調番轉背面，研究咗一下先轉到去咪牌正面，搞成咁，佢都忍唔住笑咗出嚟。有傳科學家愛因斯坦唔識綁鞋帶，睇嚟學者喺其專長以外嘅小事上，可能都會有少少盲點呢！