中環出更：42年零嗌交 莊哲猛秘訣向太太認錯
香港福建同鄉會永遠名譽會長莊哲猛早前舉行珊瑚婚晚宴，慶祝同太太駱英英結婚三十五周年。莊哲猛自爆兩人由拍拖、結婚至今四十二年，從未嗌過一次交。秘訣係當兩人有爭拗時，最終都係自己認錯，咁就冇交嗌喇！
莊哲猛喺台上妙語連珠，形容太太有「四狠」，以為佢想趁機數落太太喇，點知係講緊「很」字，勁讚太太很漂亮、很聰明、生意做得很好同埋很照顧家庭。莊太聽到冧爆，話兩人未嗌過交係因為老公包容就真。莊哲猛仲講起同太太相識過程，係堂兄攞咗四張戲飛請佢哋睇，但睇完佢完全唔知係咩戲，因為全程係咁偷睇隔籬嗰個靚爆鏡嘅女仔喎。
唐卓敏義診 話長者求安心
呢場溫馨晚宴係由莊家大女莊菲娜（Fiona）同細女Sarah負責策劃。Fiona老公、中華總商會副會長楊華勇（Johnny）同三個仔女都有到場。Johnny話未同Fiona結婚前，外父就同佢講過幾十年都冇同老婆嗌交，言下之意，即係要佢好好對待Fiona。Johnny笑稱呢句說話好似緊箍咒咁，令佢唔敢忘記。
著名核醫學專科醫生唐卓敏同太太林青都喺度，講起夫妻相處之道，唐太笑稱多數係自己忍老公，當兩人有爭拗時佢就唔講嘢住，等老公條氣順咗再拎番出嚟講，件事就完美解決喇！當日佢哋啱啱落社區為獨居老人義診，唐醫生話義診都係量血壓、問吓症咁，好少真正開藥，好多長者只係想聽醫生講一句「你冇事」，就真係成個人開心晒，可能一個人如果開心，免疫力就會提高！
卓妮