政情：關島影結婚相 葉文斌有排驚
北韓早前揚言考慮攻擊美國屬地關島，令到國際密切關注局勢發展，擔心戰事一觸即發，而屯門區議員葉文斌都同樣關心，事關將喺下個月啟程前往關島影結婚相囉！
葉文斌透露，一早就安排會前往關島影結婚相，亦因為未婚妻嘅宗教信仰，屆時會到當地教堂象徵式行禮，年尾先喺香港正式註冊同擺酒，因為香港好難預約教堂進行婚禮咁話。
放棄去美軍基地打卡
面對導彈威脅都唔改期，除咗為咗當地教堂，葉文斌仲話因為一早畀晒錢囉，難怪佢要焗住去喇！不過，佢嘅行程都有作出調動，因為本身想去當地美軍基地打卡，依家都避免去嘞！
天氣問題改過幾次期
除咗去關島影相，其實葉文斌嘅婚紗相都有喺香港取景。炎炎夏日着晒成副武裝影相都真係幾辛苦，佢仲透露因為天氣問題改過幾次期先完成到，真係歷盡風雨喎。