政情：兩疑似律政司人選拒回應傳聞
盛傳候任特首林鄭月娥籌組新一屆問責班子時處處碰壁，多名心水人選及外界人才都唔肯加入「熱廚房」，政界傾向相信律政司司長袁國強會過渡到新班子，並留任至高鐵一地兩檢處理完畢為止。政界消息曾指，大律師公會前主席譚允芝、法律政策專員黃惠沖同律師會會長蘇紹聰都係疑似律政司人選，三人尋日同場出席一個法律活動，除咗黃惠沖早走未有回應之外，另外兩人都異口同聲咁話消息只係傳言，唔會作評論喎。
譚允芝暗示暫無意做官
林鄭曾講過想多啲女性出任主要官員，政界一度傳出佢邀請譚允芝做律政司司長，而譚亦未有完全拒絕。之不過，譚允芝尋日被問到有冇獲邀出任律政司嘅時候就話，外間對人選有好多傳聞，而自己卸任大律師公會主席之後都仲有好多涉及商業同知識產權嘅工作，似係暗示自己暫時無意做官。
外間亦有講法，話袁國強處理完一地兩檢之後就會卸任，並喺內部晉升黃惠沖。被問到黃惠沖適唔適合做律政司司長時，譚允芝話要視乎新特首想要乜嘢形象嘅司長，佢就唔識評論。
至於另一名疑似律政司人選蘇紹聰就話坊間嘅講法只係傳聞，自己現階段會做好法律界專業操守嘅推廣，以及聯繫一帶一路同大灣區嘅法律服務工作。其實律政司司長呢個位始終比較敏感，就算有意思想做都難免要忍一忍口，等中央首肯先夠膽講喇！