政情：容海恩無懼寒風玩獨木舟
立法會議員容海恩（Eunice）早前自爆係好鍾意打機嘅，但原來「宅女」都有好動嘅一面，而且與水有緣，佢早於中學時已經玩過獨木舟，連扒龍舟、拯溺訓練等都試過，認真估佢唔到嘞！
Eunice早前出席活動後話，早於初中階段已報名參加康文署嘅獨木舟訓練課程，不過當時嘅課程同依家一樣咁搶手，所以佢特登挑選被外界認為係「凍到跳舞」嘅時間去玩，直言當時為咗參加要逼住忍受寒風，睇得出有幾咁鍾意玩獨木舟。
話扒龍舟其實唔難
除此以外，Eunice都曾經參加拯溺訓練，更喺七至八年前落過水扒龍舟，表明唔怕曬黑喎。佢話當年需要訓練足一季、每個星期練一日，所以現時實在抽唔出時間去扒龍舟，佢更分享過去經驗，稱扒龍舟並唔困難，因為除咗好認真咁出盡力扒，亦都可以輕鬆地只跟隨節奏去扒。Eunice講到跟隨扒龍舟嘅節奏咁輕描淡寫，唔知同佢本身有一定嘅音樂底子有冇關呢？