政情：林偉雄爆囝囝未掂過女仔手
唔少父母除咗關心仔女嘅工作，都會關心佢哋嘅感情。香港表廠商會常務副會長林偉雄話，個仔依家喺投資銀行工作，但連「女仔手都未掂過」，就算有女仔問個仔鍾唔鍾意佢，阿仔都話不如做朋友。佢曾講笑咁問阿仔係咪基喎！
林偉雄話，個仔喺紐約讀書，大一暑假去上海交通大學讀普通話，同時做零收入嘅實習。不過大二暑假就入咗一間國際大投行實習，只係暑期工都有五萬蚊一個月，到大三暑假已經有四間投行請佢做暑期工添！依家個仔畢咗業喺投行工作。所以佢認為學生哥打暑期工，一開始唔應該吓吓講錢咁話。
自己剛讀完國際科管碩士
講起讀書，林偉雄早前完成職業訓練局與英國一間大學合作嘅國際科技管理碩士課程，當時職訓局去商會推廣，佢自恃細個讀書叻，就自告奮勇報讀，點知讀落先知唔係咁易，個個星期六、日都去圖書館溫書同寫論文。雖然辛苦，不過好處係部分課程可以喺唔同國家讀，佢喺英國返學時，落堂後仲去睇波添！