政情：阿Ann鬧中環展城館全球最醜
立法會財委會與轄下人事編制小組、工務小組尚有大量積壓議程，政府高層早前請求議員高抬貴手，如非必要都唔好提出中止待續、臨時動議或休會辯論。但喺人事編制小組會議上仍然有民主派議員拉布，此舉激嬲咗一眾建制派議員一時「火花」四濺。
叫當局檢討宣傳方法
議員蔣麗芸（阿Ann）唔知係咪想緩和緊張氣氛，發言時突然離題，炮轟政府嘅中環展城館係全世界最醜樣嘅展覽館添！
阿Ann話，幾個月前曾參觀宣傳香港規劃與基建嘅展城館，但喺展覽館入邊根本睇唔到未來嘅香港。佢對住出席會議嘅發展局常秘韓志強說，「我語重心長同你講，唔該你去睇睇，我見到真係想喊，呢個係全世界最醜樣嘅展覽館！」阿Ann又斥展覽館只有兩條影片，「YouTube download（下載）都靚過你」，呼籲當局檢討宣傳方法。