政情：自爆年紀大林琳諗過去雪卵
事業女性往往因為工作忙，拍拖都未必有時間，想結婚生仔就更困難。荃灣區議員林琳最近同一個年紀細過自己嘅男仔拍拖，雖然係姊弟戀，但係都相當甜蜜。林琳自爆話未拍拖前，曾經考慮到自己年紀大，諗過去雪卵添！
林琳已經三十五歲，佢話之前好長一段時間都未有拖拍。由於唔知等到幾時先搵到個伴，但係又好想生小朋友，後來上網先發現自己已算係高齡產婦，佢都嚇咗一嚇。
被打針嚇窒打消念頭
佢話，當時好擔心會等唔切生小朋友，不過又冇理由因為咁就求其搵個男朋友，所以諗過去雪卵，仲着手搵資料添！後來聽朋友講，雪卵要打針，嗰支針仲特別痛，所以佢就被嚇窒嘞。照咁講，唔知佢會唔會向男友逼婚，早啲生BB呢？