政情：伍健批大球場過時 撐建啟德體育園

吸引勁旅訪港需頂級球場

不過作為傑志會長嘅伍健就話，一個頂級球場先可吸引到更多世界級球會來港獻技，而香港大球場都起咗廿五年，球場設施已過時，就連球員同球證更衣室都追唔上現代需要，所以業界都希望啟德體育園可以盡快落成使用，吸引外國球會來港。不過立法會仍就體育園項目拉布，唔知業界嘅聲音班議員又聽唔聽到呢？

伍健喺佢嘅專欄話，喺廿幾年營運球會過程中辦咗廿幾場外隊表演賽，包括AC米蘭、巴塞隆拿、阿仙奴同曼聯等，地區賽都有亞冠盃、亞協盃，發現球迷比較重視可為港爭光嘅賽事，而吸引外隊就要有一個頂級球場。如果體育園只係以港超入場人數設計，就冇可能辦到傑志對熱刺呢啲大型賽事。

佢又話起一個球場唔係一時三刻嘅事，如港隊或球會要取得成績先可以向政府爭取建新球場，硬件同發展就會接唔上軌，所以起球場同本港足球發展要同時進行咁話。睇嚟如果本港足球要發展，都要快啲起番個似樣嘅球場喇！