中環出更：區宇凡唔扮嫖客 驚太好戲老婆誤會

見到區宇凡呢日一身戲服同另外幾位女士一樣，原來佢第一次參與就準備反串演出妓女一角，佢仲講笑話選角時心諗既然都係扮，就不如徹底啲豁出去，扮妓女喇！呢日佢仲即場同幾位參演成員一齊跟鳴芝聲劇團台柱蓋鳴暉學「揈水袖」，相當搞笑。

李鋈麟吳國榮齊扮嫖客

李鋈麟連續兩年犧牲色相扮演「媽媽生」後，今年決定轉型，同吳國榮齊齊扮「嫖客」。李鋈麟話今年嘅慈善粵劇晚會將為「東華三院檔案及歷史文化基金」籌募經費，而佢今年因為做主席，要負責招呼來賓，着住戲服好唔方便，所以劇團就幫佢度咗一個角色，係着住西裝由法蘭西飄洋過海，順路喺溫柔鄉逗留，再帶區宇凡「從良」，啱晒佢唔使換戲服都可以演出。佢仲大讚劇團相當專業，舊年佢臨時爆肚，劇團成員依然輕鬆接招，驚喜連場。

副主席譚鎮國就派出太太譚許詠瑜擔演，點解？譚鎮國笑笑口話因為太太鍾意睇古裝片，一直想試吓着古裝衫，加上今次慈善粵劇場撞正佢太太生日，做善事過生日特別又有意義喎。呢日一班員工仲幫董事局內的五月之星慶生，原來李鋈麟同副主席馬清揚同年同月同日生，吳國榮當日更係正日添！

王賢誌（左起）、文穎怡兩名副主席同總理馮敬安現身撐場。

總理范曾晞雯（左起）、總理陳黃燕君、李鋈麟、譚許詠瑜同總理曾慶芸均會參與演出。

卓妮