政情：擅取漫畫人物宣傳 梁子穎撲火致歉
要做好地區工作，首要係加強聯繫街坊，而訊息發放好靠貼海報同掛橫額，用嚟做活動宣傳或招收會員，但係工聯會葵青區議員梁子穎嘅海報就因為喺網上偷取《草日漫畫》一幅名為「梁家婦女」嘅漫畫插圖而捱轟，更要急急將所有海報單張下架，同埋就事件向版權持有人致歉呀！
《草日漫畫》fb發聲明斥責
梁子穎發出嘅海報，標示安蔭婦女會，梁家婦女招收會員，並刊出一幅插圖；而《草日漫畫》尋日喺社交網站facebook發表聲明，斥責梁子穎未獲授權就擅自採用佢哋嘅漫畫插圖，並要求佢尊重作者同埋知識產權，又澄清《草日漫畫》同由梁子穎擔任顧問嘅「安蔭婦女會」並無任何關係。
事件曝光後有唔少網民留言，批評會方唔尊重知識產權、更直指佢「少少版權費都唔畀」。梁子穎知悉事件後就立即撲火，承認係疏忽先會未經作者同意就使用有關插圖，承諾即日會清除所有海報單張，以及發表道歉聲明，講明啲插圖嘅作者實屬何人喎。
