中環出更：新民黨黨慶 葉劉 田二少握手唔合照

最搞笑係田二少入場簽完名後，喺塊簽名板附近逗留，期間有嘉賓同田二少講「今日你主場喎」，似乎忘記佢已經退咗黨。喺儀式開始後，田二少一直都留喺會場後方，佢就話自己嚟到都唔覺得尷尬，啲朋友同舊黨友都對佢好友善，令佢覺得驚喜，不過為免人哋忘記佢已非黨員，佢一見人就話「你知我退咗黨啦」，聽落又真係有啲贈興嘅感覺。儀式開始咗冇耐，田二少就離開咗。

出席活動嘅仲有特首梁振英、候任特首林鄭月娥及候任特首辦主任陳國基等人，仲有多位司局長都有畀面，包括政務司司長張建宗、財政司司長陳茂波等。競逐特首失敗嘅前財政司司長曾俊華亦有出席，但就只係玩「快閃」，冇同梁振英及林鄭月娥碰面。

容海恩用成個鐘打扮

新鴻基地產執行董事郭基煇亦有到場，佢一見到立法會議員容海恩（Eunice）即刻留意到佢盛裝打扮。Eunice就話特登用咗成個鐘去化妝同整頭髮，一年一次着得咁靚啦，雖然着長裙，但係因為夠高，所以唔會覺得容易絆倒喎！

葉劉淑儀忙着迎接嘉賓，冇時間同田北辰合照。（徐家浩攝）

田北辰（左）談笑風生，被誤以為係主人家。

卓妮