政情：符傳富北京交流冇被洗腦

近年嚟香港啲大學搞迎新營好多時玩嘅遊戲太大膽，搞到唔少新生避之則吉。日前同阿Mark講起呢件事，佢話細個嗰陣為咗避開迎新營，就走避到北京，原來當年佢見到五百蚊九日嘅交流團，覺得抵到爆，咁就可以去玩之餘，又可以避開迎新營嘞！

自爆因為普通話太差

講起呢個交流團咁抵嘅價錢，阿Mark笑指都要上啲有洗腦成分嘅堂o架，當中亦會講下美帝之類，但佢就完全免疫，冇被洗腦喎。聽起嚟相當理性咁，但問真啲點解，佢就自爆當時因為普通話太差，大部分都聽唔明，直至佢畢業後，去上一啲有關內地會計嘅課程，先學識聽普通話。

雖然阿Mark係會計師，但佢係讀精算嘅，仲係尖子嚟，但佢話讀大學嘅時候，有啲科目成績唔合格，一度諗過係咪要轉科，但後來都係捱埋佢，先考到合格咋！