政情：暴力難解困 慈悲心紓紛爭 梁愛詩教港人洗「躁」

二○一四年爆發歷時七十九日嘅佔領行動，搞到社會撕裂，更令本土同港獨思潮崛起，經歷旺角暴亂事件後，仲發生佔領西環、立法會宣誓風波，愈演愈烈。早前部分佔中搞手同參與旺角暴亂嘅人士被檢控，民主黨（白鴿黨）主席胡志偉竟然拋出「特赦論」，話希望新政府上任後，可以特赦同佔領行動有關連嘅人士，包括七警同埋佔中人士，以換取「大和解」。但此話一出，就畀包括泛民在內嘅唔同黨派炮轟，胡志偉惟有急急跪低，收回相關言論兼道歉。

以「亂」同「變」形容現今世界

社會爭拗無日無之，梁愛詩尋日喺活動中亦話，依家世界烽火滿地，政府之間就劍拔弩張、導彈相向，搞到全世界只可以用「亂」同「變」呢兩個字嚟形容。佢覺得喺世界中，香港人係身在福地，但社會紛爭就愈嚟愈多，大家之間嘅矛盾亦都變得激烈，好多人心情浮躁，甚至有小部分人以為可以以暴力解決問題，例如佔中佔旺，令人擔心。

到底可以點解決呢？梁愛詩就覺得港人要以佛陀為榜樣，發慈悲之心、懂得自我反省、清潔心靈、多點包容、少點執着，拋開煩惱，心靈就可以得到解放，無論面對順境或逆境，都可以安然自在。

對新一屆政府充滿信心

提及香港回歸二十年，佢認為喺一國兩制下亦都度過咗無縫交接，仲因國家經濟強勁而可以繼續發展金融同經貿等行業，雖然過程中有啲挫折，但不減香港嘅繁榮穩定。對於新一屆政府，佢就話充滿信心，相信可以恢復社會和諧，市民都會團結一致。