中環出更：吉隆坡樓價低 吳永嘉心動想入市
早排有唔少立法會議員都趁唔使開會去外遊叉電，而吳永嘉（Jimmy）就選擇去近近地嘅吉隆坡，除咗日日大歎美食之外，佢更話趁機去睇樓，仲大讚當地樓價低、面積大，睇嚟佢都心動想入市喎。
笑言退休去嗰邊生活
Jimmy話吉隆坡樓價比香港平得多，面積達一千呎嘅單位售價只係三百幾萬港元，直指呢個售價喺香港連公屋都買唔到添！除咗面積夠晒大，佢更形容「靚過香港九倍」，加上位於交通方便嘅地區，難怪佢都承認睇到心郁郁，更講笑話退休去嗰邊生活都得喎。之不過，有辣有唔辣，佢就話當地稅重而買車比香港昂貴得多，所以喺當地生活都要停一停，諗一諗衡量下喇！
另外，Jimmy喺旅程期間每日都食足三至四餐，試勻當地特色美食，好似肉骨茶、蝦麵等。不過，佢就好有自信話唔會增磅，因為每日喺酒店都有游水同健身，做足運動喎，但佢就話短短四日已經曬黑晒喇！
卓妮