中環出更：波叔急不及待晒財爺官邸

年頭「升呢」做財政司司長嘅陳茂波（波叔），雖然任期得番幾個月，但上任冇耐就花咗八十三萬元翻新官邸，上個月已經搬入官邸。波叔日前就邀請咗四十幾名嚟自天水圍嘅基層市民到訪官邸，仲將活動短片擺上網誌，係佢上任以嚟首次公開官邸，睇嚟真係急不及待要晒吓喎。

喺短片所見，佢喺官邸外嘅草地招呼班市民，仲同佢哋有講有笑添！而咁近距離睇到官邸外貌，平時根本冇機會。之不過，呢屆政府嘅任期剩低唔夠三個月，若果佢喺下屆政府冇得留低嘅話，就要喺六月底搬走嘞！

波叔喺網誌話，對基層市民所面對嘅經濟壓力同生活困境感同身受，佢又不厭其煩咁講番細個家境清貧，住喺大坑西木屋區，遇過唔少次火災同風災，甚至試過失去家園，呢啲經歷令佢明白教育對下一代嘅重要。

佢勉勵基層兒童，只要努力學習、充實同裝備自己，懷着自強不息嘅決心同毅力，總可以一步一步達到目標。佢希望基層兒童將來學有所成，回饋父母養育之恩，服務香港。

卓妮