中環出更：吳宏斌推動商機 不分國籍
香港有唔少落地生根嘅少數族裔成功商人，但城中幾大商會卻少見有唔同種族嘅會員。中華廠商聯合會（廠商會）副會長吳宏斌（斌哥）就搞搞新意思，早前邀請一班以色列同印度商界翹楚出席交流晚宴，歡迎佢哋加入廠商會。香港以色列商會主席雷夫爾赫魯尼（Rafael Aharoni）都有到場，佢對呢個建議好有興趣，仲話會積極鼓勵會員加入添！
雷夫爾喺香港定居四十幾年，係以色列商界喺香港嘅領袖，佢笑稱自己一早已係香港人，仲話依家香港最需要嘅係團結喎。香港印度鑽石總商會都有多位成員現身。
斌哥話以印係全球最大嘅鑽石供應地，希望佢哋加入廠商會後，可以促成喺廠商會轄下成立鑽石行業委員會，齊齊推動國際化。
幫手邀請呢班嘉賓嘅斌哥兒子、國際珠寶設計師協會前主席吳景瀚話，當日出席者多數喺香港定居二、三十年嘅名門望族，仲識講廣東話添！佢認為推動少數族裔商界加入，有助於透過商會去協助少數族裔基層居民融入社會，好有意義。
虞茱迪不斷引入國際潮牌
同場仲有廠商會副會長陳淑玲、香港鑽石總會副主席姚蔚然、香港華僑華人總會青委主席陳昆、名人虞茱迪（Judy）同「朱古力公主」王淑筠等人。
講起國際化，Judy係表表者，佢多年來不停搜羅國際潮牌引入來港，最近就喺法國發現一個推崇純天然、手工打造嘅鞋履品牌，連鞋底樹膠都係天然嘅，一着上腳就好舒服，咁正梗係即刻引入香港喇！
卓妮