政府快將換屆，雖然商務及經濟發展局局長蘇錦樑去留未定，但身為下屬嘅副局長梁敬國未知係咪覺得可以鬆一口氣，日前出席一個服務從業員微笑指數活動時，當住近百名打工仔面前大呻做下屬嘅辛酸，爆肚話「我都係打工仔，都知上司難頂」，搞到聽眾忍唔住發笑。致詞臨近尾聲時，梁敬國話，本來想講希望下次可以再做嘉賓，不過唔知仲有冇機會同大家講嘢喎！下屬如此敢言，唔知蘇錦樑有何感想？
