政情：周雪烈日下追猛男 只為生意
做生意要成功，從來都係憑努力，唔係靠運。做歐洲時裝代理生意嘅伊娃集團執董周雪（Eva），最近為咗簽一個意大利時裝品牌代理合約，趁意大利老闆去泰國布吉度假時，不惜千里追埋去泰國。結果喺陽光燦爛嘅沙灘上呆等三、四個小時，終於得咗。
爭取代理 緊貼拳擊手老闆
Eva笑笑口話，今次去布吉話就話喺沙灘上呆等，但係其實佢都大飽眼福o架！因為嗰位意大利老闆係知名嘅拳擊手，今次同埋廿幾個拳擊好手一齊去，個個身形槐梧，大晒肌肉，睇到佢目不轉睛。同行嘅Eva老公邱家銘就笑稱，成班六舊腹肌猛男喺眼前，佢即刻相形見絀，所以要操番啲肌肉先得嘞！
講起做時裝代理，外人以為好輕鬆，咪日日睇吓靚衫、得閒睇吓時裝騷咁囉！Eva就話呢行經常要同時間賽跑，尤其係換季轉款時，忙起上來真係氹氹轉o架。