政情：田二少退黨拖埋樁腳？

立會主席一役陷冰點

田二少同葉劉不和已經係政圈中公開嘅秘密，聽聞令兩人關係陷入冰點嘅關鍵，同今屆立法會主席選舉有關。當時田二少有意競逐，但係葉劉喺梁君彥有足夠提名下，依舊獻上提名票，而非支持黨友田二少，令當時唔少新界西黨友都睇唔過眼。

後來葉劉準備特首選舉，田二少為顧及情義，仍落力幫忙，喺最新民調結果中，田二少亦受惠於葉劉特首夢碎嘅同情分而有所上升。所以有新民黨口痕友形容兩人之間仍然「有愛」，相信田二少嘅退黨念頭已動搖，未必實行。

消息指田已口頭提出

然而知情人士透露，田二少已經喺上周向黨內人士口頭提出退黨要求，不過至今仍未有書面申請，令其退黨程序未能正式啟動。該名人士直指田二少久未遞信做法唔尋常，質疑佢有心憑藉交接期，與長期合作開嘅新界西地區樁腳作最後接觸，並借機挖角，擔心呢個行為會引發新一輪退黨潮，所以寧願田二少決斷遞信，令新民黨可以立刻處理其退黨申請。

田二少尋日回應上述傳聞時，唔單止冇第一時間否認，更反問消息來源，睇嚟係驚訝退黨一事已經張揚開去。咁佢會唔會拉大隊走人？佢答咗三次「現階段無回應」就拂袖而去。

其實田二少喺新民黨內有一定嘅影響力，佢嘅退黨必定會影響新民黨嘅運作，不過黨內人士認為，田二少既然萌生去意，長痛不如短痛，盡快斬纜好過，咁該黨先可以盡快為日後發展作出部署。