政情：蛋糕切到底 林琳唔怕嫁唔出
生日梗係要有蛋糕喇，但切蛋糕都有學問o架！荃灣區議員林琳尋日生日，喺出席青年民建聯活動時，一班黨友為佢慶祝，但喺切蛋糕時，佢就突然自爆，自己舊年先知原來生日蛋糕唔可以切到底，即係三十幾年嚟佢都係切到底喇，而直至尋日先知原來習俗上認為，如果蛋糕切到底就會嫁唔出。
其實林琳都唔使怕，雖然佢曾大呻做區議員令男士唔敢埋身，但原來佢最近拍緊拖嘞，對方係早已認識嘅朋友，年紀亦比佢細啲。林琳大讚男朋友，有時會陪佢落區，雙方亦已經見過家長，仲去台灣為佢慶祝生日。
覓得意中人 甜甜蜜蜜
佢哋關係咁好，會唔會閃婚o架？林琳就笑住叫記者問佢男朋友喎。
不過，佢亦指男朋友有一個缺點，就係令佢拍拖後肥咗好多，但又笑指對方肥得仲多，可能係佢哋心廣體胖，又或者係男朋友經常帶佢食好嘢喇！其實佢哋只要將跑步當拍拖，咪唔怕繼續食好嘢囉！