政情：明奸漢奸黎 勾結美鷹派 撰文唱通街
做漢奸理應收收埋埋，唔畀人知，偏偏喺言論自由大過天嘅香港特區，連做漢奸都可做到「光明正大」，慌死人唔知！外號「漢奸黎」嘅壹傳媒黎智英，尋日就同時喺旗下刊物《壹週刊》同《蘋果日報》撰文，自爆早前曾與兩名美國鷹派前外交官及美軍高層會面，並大讚新任美國總統特朗普嘅強硬對華政策，反映佢一心一意要做「明奸」而非「暗奸」。
「上將講得太好」 擦鞋擦出面
漢奸黎喺文中首先大讚特朗普打破中美多年嚟嘅外交慣例，與台灣領導人蔡英文通電話，認為有關動作「不是一時的輕狂，而是深謀遠慮的神來之筆」。佢又引述一啲美國前高官同智庫學者指，形容蔡英文係政治天才。
漢奸黎隨即自爆，早前佢親身到過美國首府華盛頓，與美國鷹派外交代表人物、前副國務卿及前常駐聯合國代表博爾頓（John Bolton）會面，並表明同意對方提出美國應加強關注台灣，以對抗中國對台打壓嘅主張。
漢奸黎之後仲喺博爾頓介紹下，同一位小布殊時代嘅四星上將，喺當地一間有成七十年歷史嘅高級會所式牛排老店食晚飯，但今次佢就故作神秘，冇披露對方嘅名字。該位上將喺飯敍中讚揚特朗普係「有史以來最聰明的幾位總統之一」，認為台灣一定不能對中國示弱，要主動成為美國同中國策略上嘅爭取對象，美國與台灣應加強民間交流以至官方接觸。漢奸黎形容有關講法有如「醍醐灌頂」，直言：「上將，你講得太好了！」
漢奸黎喺文章結尾表示，自己因為飲咗太多酒同時差問題，現已記唔起雙方最後仲講咗啲咩。不過，唔知佢係真係飲醉咗，定係故意借醉講咗更多反中亂港、聯美抗中嘅奸計陰謀呢？
示威者繼續力數八大惡行
另外，反漢奸黎嘅示威持續，尋日下午一時三十分，再有兩名聲稱自發行動嘅男女，前往漢奸黎位於何文田寓所附近，帶同印有漢奸黎樣貌，以及印有「肥佬黎 佔中黑手 八大惡行」等字句嘅海報示威，力數漢奸黎涉及八大惡行，包括勾結外部勢力、佔中金主、唱衰香港警察、離間中港關係等，二人其後和平散去。