中環出更：黨慶唔請陳維安 白鴿又做小學雞
民主黨（白鴿黨）下周五舉行廿二周年黨慶晚宴，邀請出席嘉賓時玩「小學雞」，除咗一如既往拒邀特首梁振英、財政司司長陳茂波和教育局局長吳克儉外，今年仲新增唔邀請立法會秘書長陳維安出席。
宣示對陳處理宣誓風波不滿
身為白鴿黨司庫嘅籌款委員會主席袁海文解畫，唔請陳維安係中委會決定，以示對陳於處理去年立法會宣誓風波嘅不滿。
白鴿黨前年同政府關係跌到新低點，當年政府問責官員齊齊杯葛出席晚宴，但隨着時間過去，或現微妙變化。白鴿黨尋日舉行記者會公布黨詳情，宣布除咗三名特首選舉候選人已答允出席外，袁海文透露，今年答應出席黨慶有三名問責官員，另有五名高級公務員。
籌款委員會委員、前立法會議員李華明補充，出席官員喺「數字上多過上年，但分量上少啲」，拒絕透露確實官員名字，以免佢哋最後因種種原由未能出席。
另一方面，白鴿黨今年籌款目標係六百萬元，低於去年嘅八百萬元，又會取消晚宴期間嘅拍賣環節，改為以賣藝方式籌款。李華明否認同早年曾出現拍賣假畫風波有關，稱拍賣環節氣氛一向好差，有關決定旨在避免影響黨慶氣氛。
卓妮