中環出更：寫藏頭詩暗寸黃傑龍搞喊老師
早前稻苗學會舉辦以校服為主題嘅晚宴，講開學生時代嘅點滴，大家都百般滋味在心頭，其中稻苗學會會長黃傑龍（Simon）自爆，學生時代曾作藏頭詩寸中文老師，起初該名老師對此不知情，當有同學提醒先知其背後意思，最終激到該名老師衝入教員室喊，自己爭啲要喺教員室跪低先氹得番老師！
講起近日有學校發生便服日風波，稻苗學會主席邱金榮話細個於內地讀書，唔使着校服，後來夜校亦同樣着便服返學，所以依家間中有活動可以畀佢着校服出席，就感到特別興奮。Simon就話以前學校冇便服日，但當冬天凍到低過某一個溫度，學生就可以着自己嘅外套。
同一場合仲有兩個着晒校服、犯晒校規嘅「學生」出現，其中一個係稻苗學會委員何健，佢笑言「攝呔」唔一定代表係壞學生，而籌委會聯席主席陳岳成則話，呢個做法係為咗方便打籃球同打排球，睇佢一身健康膚色就知，何健其後補充話，當年讀書時個校章係用膠紙黐上去，事關放學要繼續做運動。
少年胡珠怕醜 唔敢識女仔
現代管理（飲食）專業協會會長胡珠亦有到場，不過佢一身裝束被指似學校嘅訓導主任，事實上，胡珠於二十多年前已經喺內地教飲食管理，算得上係半個老師。佢之後講番學校那些年生活，透露以前每當有聯校聖誕舞會時，就算見到其他學校嘅女生喺佢面前來回經過幾次，佢都唔敢主動行埋去同佢哋傾偈，就咁睇，胡珠當年讀書時都有多少怕醜喎！
卓妮