政情：推廣非遺 高燕熱捧紫砂壺工藝
中國文化歷史悠久，中港兩地都有唔少被列為國家級或世界級嘅非物質文化遺產（非遺）。做投資銀行嘅香港內蒙古總會秘書長高燕對非遺就十分着迷，一直致力推廣及保護非遺工藝及傳承人。多年前佢接觸到被列為國家級非遺嘅紫砂壺製作工藝之後，就鍾意咗紫砂壺，依家屋企有好多隻靚茶壺。佢笑笑口話，因為養壺嘅貼士係每一隻壺只沖泡一種茶葉，所以儲埋儲埋就有好多喇！
分享養壺心得
高燕話，紫砂壺係江蘇宜興特產，由於當地紫砂礦已枯竭及禁採，所以市面出現唔少使用化工泥嘅紫砂壺，分分鐘食壞人。佢教路話，紫砂泥有透氣性，所以靚紫砂壺應該喺清洗完之後，用口對着壺心用力一吹即乾，大家不妨試吓。
講開養壺，高燕話秘訣係要常用，茶香先會滲透到壺內。好似依家天寒地凍，壺癡甚至會將紫砂壺抱喺手心，一邊取暖一邊摩擦壺身，如是者用咗十幾次之後，個壺質地就會唔同晒嘞！