政情：鄧家彪 黎穎瑜 細數同窗點滴
讀書時代同窗眾多，但畢業後能否碰頭相信就要講緣分。區議員鄧家彪（Bill）同勞工及福利局政治助理黎穎瑜（Jade）就頗有緣分，佢哋係當年就讀中文大學社會科學時嘅同學，後來就前後腳踏入咗政界發展。早前兩人出席一個活動時，一見面傾個不停，仲細數啲知名嘅師兄師姐同埋老師。
Jade話，大學時佢參加過辯論隊，當時立法會議員劉小麗係佢嘅助教，兩人仲同場爭辯過，後來劉小麗從政，兩人仲一早就相認添！Jade咁有辯才，又有冇同Bill拗過呢？Jade就話兩人同班時仲好「幼嫩」，未曾拗過，而且Bill都唔係辯論隊成員。
Bill呻囡囡未遺傳口才
雖然係咁，但Bill做過立法會議員，口才都有番咁上下。不過佢呻讀緊小學三年級嘅囡囡遺傳唔到佢嘅口才，事關囡囡認真討論時會口窒窒，不過佢平時講嘢夠晒嗲，唔驚會影響囡囡升中學咁話。