政情：曹貴子想驗染色體「算命」
早前保良局董事局一班成員與千位長者拜年，保良局總理曹貴子都有出席。講起有冇諗過將來自己嘅退休生活會係點，本身係醫生嘅曹貴子就話，現時醫學技術已經可以憑染色體，推算一個人嘅壽命大約有幾長，佢之前一直唔敢驗，不過最近終於的起心肝，準備去試吓驗嘞！
未考慮完全退休
曹貴子話，驗出自己大約可以活到幾多歲之後，就可以透過改善生活習慣、飲食和運動等，去改善身體情況。現時人均壽命愈來愈長，尤其港人特別長壽，因此佢都唔會諗住完全退休，又話自己啲小朋友年紀仲細，所以只會考慮部分退休。
即係點？佢解釋有啲工作需要大量精神或體力去應付，例如佢做醫生，到咁上下年紀唔夠專注力，自然就要退休。不過佢喺投資方面心得唔錯，到時就可將精力轉為集中喺投資上，咁咪唔使擔心退休後冇錢使囉！