政情：民主阿婆抽七警水 唯恐天下不亂

七警被判刑已有成個星期，但民主阿婆依家先醒起要回應事件。佢一方面話香港喺佔領期間社會分裂，警隊執勤時面對一定壓力，另一方面又指咁都唔係七警將曾健超抬到暗角毆打嘅理由，炮轟警隊辜負市民信任，濫用私刑且不加反省。

民主阿婆又話，法庭已對七警案作出判決，社會必須尊重，任何一方認為判決不公，應循司法途徑提出上訴，而唔係辱罵法官，或將警隊與二戰期間嘅猶太人遭屠殺相提並論；警務處處長作為警隊首長，有必要盡快站出來以正視聽喎！講到咁大義凜然，點解陳太又無對黎智英及佔中三子至今未被檢控、大量佔中違法者獲放生及輕判出過半句聲呢？

講開佔中及七警，立法會議員蔣麗芸（阿Ann）都發生甩轆笑話。事關有人發現佢計劃喺嚟緊星期三嘅立法會大會提出口頭質詢，要求特首特赦佔領人士！咁得人驚？其實阿Ann係想要求特赦七警員。

促「特赦」佔領者 蔣麗芸甩轆

話說阿Ann提出嘅質詢標題為「赦免與佔領運動有關的刑事罪犯或減輕他們的刑罰」，內容首先引用美國、法國等地特赦罪犯嘅例子，又話「有不少參與佔領行動的年輕人是為了追求理想而誤墮法網」，質詢尾段先至提出「亦有小部分執法人員在受到挑釁下，以不當方式對待被捕人士因而被定罪」，要求當局回應特首會否效法其他地方，赦免或減輕上述人士嘅控罪。睇到呢度，大家終於明白原來阿Ann係幫七警求情。

據聞阿Ann事後亦覺得自己條質詢行文有問題，但由於本文已獲內務委員會通v補充質詢，口頭上澄清解釋，避免引起更多誤會。不過，無論阿Ann點「補飛」，相信當日都避免唔到畀人玩喇！