政情：趙麗娟翻兜 重投鄉議局

為參選會計界選委辭職

有鄉議局執委認為趙麗娟喺短時間內翻兜嘅做法特別，更有人笑稱佢有「特異功能」先會短時間改變決定，又自稱作為「老鬼」唔認識佢喎。據了解，趙麗娟因增選議員嘅身份，喺舊年十二月舉行嘅選舉管理委員會界別分組選舉中，只能登記喺鄉議局功能界別中，所以需要辭職先可以重投會計界參選。

趙麗娟接受查詢時亦承認，選委選舉係佢離開鄉議局其一原因，但當時亦有私人事務需要處理，惟現時已經解決，可以重新擔任增選議員喎。佢又話一直以改善鄉議局管治同財政管理等為目標，又話只要鄉議局有需要，佢就會提供協助。趙麗娟今次大賣口乖，唔知鄉議局中人又受唔受落呢？