政情：新系統捉懶蛇 建制淆底反對
立法會過往都有唔少「大懶蛇」，經常唔出席立法會大會及事務委員會等會議，搞到會議出席率偏低，甚至唔合格。立法會秘書處就計劃今年四月推出「議員參與立法會事務紀錄系統」，詳細記錄議員喺立法會會議同活動嘅出席情況。有秘書處幫手計埋數，相信都可以減輕議員同議員助理編寫工作報告時嘅負擔，公眾亦都可以更方便查閱議員開會情況，監察議員工作。不過，聞說有建制功能界別議員就反對，但佢哋唔係反對推出系統，而係反對資料向公眾披露。唔通佢哋係怕自己大懶蛇嘅身份喺新系統下無所遁形？
現立會圖書館可查出席率
議員喺立法會各個會議嘅出席率現時都可以喺立法會圖書館查閱，但上屆立法會就有議員提出希望可以有一個更有系統同更方便查閱嘅平台記錄議員出席率，方便議員撰寫工作報告。秘書處收到意見後，就研發咗全新嘅「議員參與立法會事務紀錄系統」，呢個系統收錄個別議員出席立法會各會議嘅次數、參與公眾教育同對外聯繫活動嘅情況，同埋處理申訴個案嘅宗數等。秘書處亦希望新系統可以擺上立法會網頁供議員同公眾查閱。
民主派轟不公開即大倒退
立法會行政管理委員會上周一已通過推出新系統，亦都贊成新系統喺四月推出。不過，據聞行管會開會期間，就有建制派功能界別議員反對新系統嘅資料開放畀公眾查閱，仲提出就此諮詢全體議員。嗱！行管會建制派功能界別議員就有梁君彥、李慧琼、馬逢國、黃定光、石禮謙同鍾國斌，究竟邊個唔想公眾知呢？
對此民主派就批評，既然都花心機研發新系統，而有關資料亦係公眾現時都可查閱嘅，如果唔公開根本就係「大倒退」，嘥咗秘書處心機，亦有建制派議員透露，反對嘅議員認為過往都係傳媒同民間監察團體關注議員出席率問題，但傳媒同民間團體嘅計算可以因應立場而有偏差，但如果資料係由秘書處提供，議員就會冇藉口話係計錯數咁話。
簡單啲嚟講，有數據就有證據，新系統就好似照妖鏡咁，數據出晒街就冇得賴喇！