政情:禮賓處要求不一 蔣麗芸唔知着乜

出於尊重,去唔同嘅場合,就會有唔同嘅裝束,有時都要因應主人家嘅要求而作出配合,本來都係好正常不過嘅事,但係立法會議員蔣麗芸(阿Ann)曾因裝束問題而感到煩惱,亦因此有感「被騷擾」。阿Ann話行政署禮賓處曾一時要求佢着正裝、一時要求着西服,令佢感到疑惑係咪唔能夠着旗袍。

一時「正裝」一時「西服」

話說立法會公務員及資助機構員工事務委員會尋日召開會議,討論有關重編行政署禮賓處處長一職為高級首席行政主任。阿Ann喺會議上向有關當局提供意見,指曾接到有關當局嘅邀請信,但信上有關裝束嘅用字不一,有「正裝」、亦有「西服」,令佢感到有點混亂。佢又話雖然自己知悉旗袍都係正裝嘅一種,但希望有關當局喺用字上能夠統一。有關官員回應時就話正裝同西服係同一類型,更指若要求穿正裝,穿旗袍都可以接受。

另外,阿Ann指雖然禮賓處係行政署轄下嘅部門,但由於職銜嘅中英文名稱問題,令人誤以為「禮賓處處長」比「行政署副署長」仲要高級,又話為因禮賓處係處理政府對外嘅接待工作,擔心大眾會出現混淆,建議有關官員應該喺外邊「派卡片」,甚至作出調整。

第一手消息請下載on.cc東網iPhone/iPad/Android/Windows Phone Apps