中環出更:旅行合「家歡」促進親子關係

仲有兩日就係農曆新年,東華三院早前喺沙田馬場舉行挑戰盃,一班董事局成員配合新春主題,個個着晒紅色同金色衫現身,成個場充滿節日氣氛,喜氣洋洋。東華主席馬陳家歡同卓妮講起過年習俗時就話,東華每年年三十晚子時都會去黃大仙準備上頭炷香,所以要初一後先可以去旅行,但初六佢又會返嚟,事關初七佢哋會進行東華嘅文武廟建成一百七十周年讚星法會,所以中間幾日佢同老公馬浩文就揀咗與三個小朋友一齊去日本福岡旅行嘞!

馬陳家歡話以前旅行同老公多數鍾意陽光與海灘,自從有小朋友之後就變咗經常去主題樂園,不過都係開心嘅,順便重拾童真。馬浩文就話平日返工甚少機會全日對住小朋友,但旅行就真係廿四小時全接觸,親子關係親密好多。

譚鎮國拋抓子 一次接晒

嗰日場內有啲小攤位,賓客除咗可以製作風車外,仲可以品嘗冰糖葫蘆及懷舊糖膠等。總理韋浩文同太太龔雅頌與另一總理譚鎮國就對拋抓子好有興趣,譚鎮國仲第一次試玩就成功接住五個抓子,手身敏捷。韋浩文就話同太太細個都係喺加拿大過新年,但大部分親戚喺香港,所以冇咩新年氣氛,反而依家返咗嚟香港就好玩得多,一大班朋友夠晒熱鬧,印象最深刻就係結婚之後同太太第一次派利是,笑言要生番個(扌豆)番啲嚟幫補吓。

譚鎮國就話結咗婚之後除咗返自己家鄉虎門拜年,仲會返去太太許詠瑜嘅家鄉茂名高州,而過年更唔少得喺屋企打麻雀,不過佢自己唔係好識打,所以負責招呼朋友。同場仲有副主席李鋈麟、王賢誌、蔡榮星同文穎怡等。蔡榮星話過往新年多數飛美國工作,但依家就會返潮州與父母一齊過年特別溫馨。

卓妮

第一手消息請下載on.cc東網iPhone/iPad/Android/Windows Phone Apps