政情：橫額甩轆 民記克「勸」堅嬲
年近歲晚，唔少政界人士都會用唔同嘅方法同市民拜年，掛賀年橫額都係其中一種。之不過，尋日就有網友發現，民建聯（民記）嘅立法會新界東議員陳克勤（克勤），掛出街嘅一幅賀年橫額連自己個名都印錯，變咗做陳克勸。咁醜怪，到底克勤搞邊科呀？
鬧爆社區主任
克勤回覆查詢時就話，對印錯字一事表示遺憾，呢次掛橫額之前連佢自己都唔知情，鬧爆社區主任蔡惠誠事前唔畀啲橫額佢過目，未經佢同意就印晒啲橫額出街。睇來克勤呢次真係嬲到震。
蔡惠誠之後亦解釋，話自己一向搵開同一間製作公司幫佢印橫額，掛橫額之前亦都親自睇過個版先叫人印出嚟，點知睇完個版都仲可以漏咗眼，連自己同事個名都搞錯晒，真係抵打！
雖然同款嘅賀年橫額已經拆晒落嚟，但已經畀人喺社交網站facebook上分享到周圍都係，真係失禮死人，所以唔該下次小心啲，金睛火眼睇真啲，唔好再錯嘞！