政情：選區會「鋒」險高 隨時沒頂
立法會選舉過後，各大政黨又開始部署兩年幾之後嘅區議會選舉，民主動力早前就開會討論劃區安排。據了解，新加入嘅香港眾志（眾志）表明有意喺九龍東同港島區「插旗」，其中盛傳到時「夠秤」參選嘅秘書長黃之鋒將出戰南區海怡選區，但區議會選舉始終講求深耕細作，過往亦有唔少知名度高嘅人甚至係立法會議員，都試過喺區議會選舉輸咗畀「地頭蟲」，所以黃之鋒單靠名氣大參選區議會，隨時會「浸死」。
消息指，眾志已向多個民主派人士表達參選意願，據知黃之鋒同眾志嘅立法會議員羅冠聰曾就此同東區泛民主派會面，亦加入埋民主動力嘅協調會議，向各大政黨表明該黨有意出選區議會，希望同其他民主派協調。據地區人士透露，眾志初步會派林淳軒出戰東區嘅鰂魚涌、家住海怡半島嘅黃之鋒，最就腳亦順理成章出戰海怡，而上屆立法會選舉放棄喺九龍東參選嘅副主席黎汶洛，就計劃出戰觀塘區議會嘅牛頭角選區。至於該黨另一知名人物周庭，就因為佔領時家人被恐嚇滋擾，所以對出選區議會仍然心大心細。
據民主派人士透露，眾志嘅策略會以「打大佬」為主，民建聯長期盤據嘅北角同鰂魚涌等地，都會係佢哋目標，希望用政治明星同埋勤力落區去爭取支持。
有知名度都輸 俯拾皆是
之不過，黃之鋒雖然係政治明星，都未必有必勝把握。事關民主派政治明星參與區選出現「氹仔浸死蛟龍」嘅情況比比皆是，好似一五年區選，民協嘅馮檢基、民主黨何俊仁等都敗於建制派區選新丁之下。
至於黃之鋒可能出選嘅海怡，區議會選區分為海怡東及海怡西。公民黨郭榮鏗喺一一年參選海怡東，輸咗畀林啟暉，而其黨友、時任立法會議員嘅陳家洛喺一五年亦喺同區敗北；人民力量袁彌明無論喺一四年海怡西補選定一五年換屆選舉都輸咗畀新民黨陳家珮。由此可見，話黃之鋒就算有知名度都好，要勝出實屬不易。
有人就話，自決派之前唔認同泛民嘅深耕細作、又講明「覺得做議員任務唔係做case」，同市民對區議員嘅期望相違背。究竟黃之鋒喺呢兩年幾嘅時間，能否放下身段，同街坊打好關係呢？
網絡串流電視Netflix尋日發新聞稿，宣布購入黃之鋒最新紀錄片《Joshua： Teenager vs. Superpower》（黃之鋒：少年vs超級大國），又形容係記錄咗勇氣同年輕嘅理想主義。