政情：盧偉國荔枝樹為喻 慨嘆青年被誘違法

盧偉國以荔枝開花至結果嘅過程，比喻人生歷程。

WK喺貼文話後院荔枝樹前年首次結果，雖然收成少但都好好味。之但係上年就一粒荔枝都無，令佢大感失望。雖然今年荔枝樹順利開花，但從開花到結果都非常脆弱，經過風吹雨打後已經唔見一大截。佢話能頂得住風雨嘅，雖然未完熟，但已見到「蟬鳴荔綠」。佢仲期待後院荔枝完熟時，可以學下蘇東坡「日啖荔枝三百顆，不辭長作嶺南人」。之不過，佢笑指可能只係夠蘇東坡食半日咁上下。

• 盧偉國

話經歷風雨先可以成長

見到荔枝樹不但諗起蘇東坡，佢仲提到一班因參與示威活動嘅年輕人。佢話青少年成長期係脆弱嘅階段，頂得住誘惑、經得起風雨嘅人就可以茁壯成長。佢感慨眼見呢兩年被煽惑參與社會動亂嘅青少年，紛紛負上刑責，學業事業中斷，對於幕後黑手深惡痛絕。