政情：工黨三敗將 狼胎爭三席
政府前日再入稟要求取消多四位非建制議員嘅資格，如果全部獲法庭批准，九龍西、新界東、香港島，以及建築界功能界別都需要舉行補選，其中九西同新東更要一次過填補兩個議席，勢必喺泛民內部掀起一場廝殺戰。據聞當中最狼胎嘅，唔係兩大泛民政黨民主黨（白鴿黨）或公民黨（公文袋），而係喺九月大選中失利嘅工黨，有消息話佢哋喺三個直選選區都有意派人參選，包括前立法會議員李卓人同何秀蘭兩名敗將。但有泛民就表明，應該讓番畀被取消資格嘅自決派出選，唔畀機會工黨借宣誓風波翻盤。
建制人選幾乎揀定
雖然立法會多區補選依家只係一個假設，但建制陣營幾乎已定好晒人選，包括工聯會嘅前立法會議員王國興同鄧家彪、民建聯嘅油尖旺區議會主席葉傲冬，以及前建築界議員謝偉銓等。
本土自決派方面，自稱已放棄港獨、改為支持「一國一制」嘅中出羊子已表明會參選，熱普城嘅黃洋達同陳雲亦有傳會出戰，預計劉小麗、羅冠聰同姚松炎一旦被取消資格，亦好可能會捲土重來再戰。但人大釋法後，選舉主任隨時會收緊審批參選人資格嘅準則，上述人等未必能夠重新入閘。
泛民方面，新民主同盟范國威、民協馮檢基、兩名前白鴿黨成員鄭家富同黃成智等幾名敗將，估計都有意出戰。社民連梁國雄一旦被取消資格，可能會順勢讓位畀該黨嘅第二梯隊黃浩銘參選。至於現有兩大泛民政黨，據聞公文袋傾向唔派人出戰補選，白鴿黨雖有第二梯隊想參選，但亦都唔會強求，可能只會參加泛民內部嘅初選以提高知名度。
藉機翻盤 空降參戰
反而係喺九月大選中大敗、立會議席由四席縮至一席嘅工黨，就有意借補選翻盤，提出由原屬新界西嘅李卓人同趙恩來，分別空降新東同九西參選；若然羅冠聰都被取消資格，工黨何秀蘭亦唔排除會出戰。
不過，有白鴿黨同公文袋中人表明，如果只係填補青年新政游蕙禎同梁頌恆議席，由於佢哋根本就「抵死」，兩黨會支持由其他泛民人士取而代之。但對於劉小麗等四位最新被挑戰嘅議員，兩黨就傾向畀佢哋重新參選，奪回原有議席，唔會支持工黨咁樣獅子開大口。