政情:白鴿翻盤 改挺胡志偉擔正

民主黨(白鴿黨)原定喺今年全面交棒,立法會方面有劉慧卿、何俊仁及單仲偕等老鴿退下,由林卓廷、尹兆堅、鄺俊宇及許智峯等中鴿及乳鴿接上。黨務方面則實行黨政分家,改由非立法會議員擔任黨主席,擺明係想頒番個安慰獎,畀出選立法會無望嘅乳鴿羅健熙。不過,尋日該黨嘅現任立法會議員胡志偉,突然高調會見記者宣布參選黨主席,羅健熙就改為角逐連任副主席,莫非黨政分家同黨務交棒安排已經被推翻?

胡志偉解釋,佢今次參選嘅其中一個目的,就係喺黨政分家之前「走好最後一哩路」,做好相關嘅修改黨章工作,未有放棄。羅健熙補充,修章需要七成半會員支持才能通過,而志偉喺白鴿黨比佢耐,較能凝聚黨員同取得佢哋嘅信任,故決定支持對方「擔正」。

原擬乳鴿羅健熙接班

不過有白鴿黨中人就話,今次黨務接班安排翻盤,主因係部分老鴿認為羅健熙未贏過任何大型選舉,難以信服將成個黨交畀佢擔大旗。但如果要贏過立法會先可以做黨主席,又何來黨政分家呢?亦有說法係鄺俊宇、許智峯等乳鴿嘅激進同親本土作風,包括早前違背黨團指令,出手協助青政游蕙禎同梁頌恆,已引起唔少老鴿黨員不滿,擔心交棒交得太快太急,會令成個黨變晒質,因此改為推舉立場溫和保守、屬「大中華系」嘅胡志偉出選黨主席。睇嚟白鴿黨嘅「老人政治」同「大佬文化」,仲會維持好一段時間。

第一手消息請下載on.cc東網iPhone/iPad/Android/Windows Phone Apps