政情：文青上身 吳永嘉巴士喻立會
廠商會嘅立法會議員吳永嘉尋日中午忽然文青上身，喺Facebook上載咗兩張搭巴士嘅相，仲聯想到用巴士嚟比喻立法會，將議員比喻做乘客。
暗示有人應快啲「落車」
吳永嘉話自己不時會搭巴士，亦好鍾意喺巴士發白日夢，回想自己成為議員近兩個月，喺短短嘅議會生涯中見證唔同派別議員嘅分歧同爭拗，當中有人影響議會進度。佢仲話立法會好似一架巴士，議員就似乘客，只不過巴士嘅目的地係向社會整體利益出發，如果有乘客發覺搭錯車，最好撳鐘落車，唔好令巴士延誤，因為始終有其他乘客想準時去到目的地。咁講法，唔知係咪想暗示部分議員快啲落車，唔好阻住地球轉？