政情：李梓敬兩年抱兩男B 「辛苦老婆」
政府宣傳片成日叫人生多幾個，自由黨深水埗區議員李梓敬（Dominic）嘅細仔就喺星期五凌晨出世，太太仲要係早產o架，兩年抱兩，兩個都係仔，但佢就話最辛苦係老婆，唔會追多個女喇！
囝囝早產 重近四磅
Dominic話太太有胎盤前置，喺佢立法會選舉時一直問題不大，直至約七星期前出血，其後一直住喺廣華醫院，每日都要瞓床，為嘅係要令囝囝冇咁早出世，直至剛過嘅星期五太太再出血，於是就開刀生咗，重近四磅，囝囝依家仲喺新生嬰兒深切治療部（NICU），依家身體機能都可以，只係肺部呼吸冇咁暢順，住到五磅重就可以出院嘞，而太太今日就會出院，佢亦都請定陪月員照顧太太，佢話等太太坐完月之後，一家四口就可以出去食餐好o架嘞！
至於大仔就仲未識呷醋，應該仲未意識到自己要做哥哥，由於大仔叫Aiden，所以Dominic打算將細仔叫Alvin，同哥哥一樣係A字頭。
佢又話大仔舊年出世後三個月，佢就當選區議員，依家細仔出世，佢又積極考慮參與九龍西補選，唔知細仔會唔會帶旺到佢呢？不過最終選唔選都要視乎建制派協調。