中環出更：國際盛宴 政商名人暢談酒經
美國新任總統特朗普當選後，佢嘅靚靚模特兒太太梅拉妮亞廣受矚目，亦帶挈佢位於東歐嘅家鄉斯洛文尼亞提升知名度。香港貿易發展局早前舉行香港國際美酒展，斯洛文尼亞副總理兼農業部長Dejan Zidan就拉大隊嚟參加呢個亞洲美酒盛會，仲帶埋當地名廚來港炮製特色佳餚配上自家靚酒，唔少城中政商界人士都去享受盛宴。
出席嘅包括立法會主席梁君彥同細佬新興織造廠董事總經理梁嘉彥、香港工業總會主席鄭文聰、中華出入口商會副秘書長許華傑，仲有貿發局副總裁周啟良同展覽市場拓展總監溫少文等人。
許華傑去過斯洛文尼亞幾次，因為佢喺當地都有客戶。佢又盛讚當地嘅氣候適中，雨水少啲，所以葡萄都甜啲，釀出來嘅葡萄酒自然靚喇！
鄭文聰同太太都好鍾意紅酒，佢話早前兩人去法國波爾多酒莊，由朝早十一點飲到夜晚十一點，飲足七日，依家諗起都仲好開心。
許華傑求學時周圍試酒
許華傑就諗起以前喺美國讀書時，經常趁放假時周圍去一啲小酒莊試酒。雖然佢講到頭頭是道，不過就謙稱唔識品酒喎！
講起飲酒，有人借酒澆愁，亦有人飲酒助興，梁君彥上任立會主席後即身陷議員宣誓風波，唔知佢會唔會因為心情唔同而飲唔同嘅酒呢？梁君彥笑言，自己心情好時會飲靚酒，心情唔好就飲啤酒，佢跟住話啱啱飲咗杯啤酒喎！坐喺一旁嘅鄭文聰就踢爆話係人都知佢鍾意飲啤酒喇！原來係講笑。
卓妮