政情:收料站:建制議員開新群組踢走老鬼

新一屆立法會已經開始一個多月,然而一批建制派議員仍然沿用一二年所成立嘅舊WhatsApp群組,最離奇嘅係兩名建制前資深議員,即係「老鬼」葉國謙、譚耀宗被指仍然陰魂不散,仲留喺群組,而葉國謙更維持群組管理員身份,難免畀人感覺「名不正、言不順」,據知最近建制派群組終於全面更新,所指嘅係新設一個WhatsApp群組,正式踢走葉譚二人。

據了解,建制派部分議員對依家唔再係議員嘅葉國謙及譚耀宗仍然留在群組內一直有微言,加上建制派班長人選已變天,葉國謙交棒由商界廖長江接手,民建聯陳克勤做副手,所以新人事有新作風亦係合理期望。

現任班長廖長江出手

於是廖長江最近終於出手新設一個群組,加入所有建制派現任議員,而一眾建制派議員對此舉亦心領神會,自動波轉移到新群組去發言同交換意見,將舊有群組嘅作用逐步淡化,變相出招以行動踢走葉、譚二人。建制派撥亂反正行動喺陽光下進行,或者葉、譚二人應該識知所進退,唔好再為建制派添煩添亂嘞!

第一手消息請下載on.cc東網iPhone/iPad/Android/Windows Phone Apps