政情：莎翁名句熱炒 天文台也抽水
近排好多人改寫英國文壇巨匠莎士比亞嘅名句，好似財爺曾俊華日前改寫莎翁嘅「To be, or not to be：that is the question」，爆出一句「To run, or not to run」以回應係咪參選特首，為特首選戰再添熱論，估唔到連天文台亦乘機抽水，喺網誌用「To rain, or not to rain」為題撰寫文章，即係以「有雨？無雨？」嚟解釋難以百分百準確預測落雨機率嘅原因。
改寫句子解釋降雨預報
天文台高級科學主任李立信話天氣預報員經常要考慮到「To rain, or not to rain」，對於未來幾日會唔會落雨，有時令人費煞思量。天文台近年推出降雨概率預報，以百分率嚟表示喺某日落雨嘅機會，降雨概率分六個等級。
佢舉例指，如果降雨概率為百分之六十，即當日約有百分之六十嘅機會落雨。至於市民參考降雨概率預報時，亦須自行考慮承擔係咪安排戶外活動嘅風險。例如要到室外跑步，反正跑步亦會流汗濕身，所以就算降雨概率是百分之四十，影響都唔算好大，咁當然要注意路面係咪濕滑喇！