中環出更：慶幸吃得苦 唔怕捱中藥
尋日係香港醫學博物館二十周年籌款晚宴， 除咗一班醫學界翹楚之外仲有唔少名人出席。卓妮見到佳能高級副總裁鄧慶治（Mingo）同太太都在場，見呢日咁多醫生，唔知佢細個嘅時候又驚唔驚睇醫生同食藥呢？
講起細個睇醫生嘅經歷時，Mingo就話記得有一次，因為踢踢吓波盲腸炎，搞到要入醫院，不過佢就自言咁多年都唔怕睇醫生亦唔怕食藥，就算係中藥佢都可以一啖飲晒落肚，仲唔使搵其他嘢送藥添，笑笑口話自己好吃得苦■！
同場仲有前高官葉澍堃同太太，唔知佢哋細個睇完醫生之後有冇試過因為唔想食藥偷偷地掉咗啲藥去？葉太諗咗一諗之後話自己自細都好少睇醫生，而佢睇醫生或者食藥亦都冇乜特別恐懼咁話。而葉澍堃就話呢個年紀要識定多啲醫生，笑言年紀大咗就可能會要睇，認真幽默。
馬時亨自爆最驚打針
「快勞夾大王」杜振源、港鐵主席馬時亨同太太馬王培琪亦有現身呢晚籌款宴。原來馬時亨細個都試過因為踢波而整親，佢仲自爆最驚就係打針，平日打預防針已經夠晒驚，嗰次踢波整親條腰仲要去做針灸，大呻啲人話做針灸唔痛，其實一樣都係會痛喎。
不過，小時候打預防針可以話係避無可避，但亦因為咁畀馬時亨發現咗一樣嘢，話說小學時打預防針，啲護士好鍾意叫學生擰轉面後就直接將支針打咗落去，所以佢覺得對慣小朋友嘅醫生同護士對打針特別有計，早幾個月有朋友提議佢打生蛇嘅預防針時，佢就特登搵咗個做兒科嘅去打，相當搞笑，真係估佢唔到。
卓妮